Өнөөдөр Эрүүл мэндийн даатгалын ерөнхий газрын дарга Ц.Батбаатар болон холбогдох газар, хэлтсийн удирдлагууд Азийн хөгжлийн банкны төлөөлөгчид, “Аймгийн эрүүл мэндийн үйлчилгээг бэхжүүлэх, шинэчлэх” төслийн багийн гишүүдийг хүлээн авч уулзлаа.Уулзалтаар Монгол Улсын эрүүл мэндийн даатгалын тогтолцоо, Эрүүл мэндийн даатгалын сангийн санхүүжилт, цахим үйлчилгээний талаар мэдээлэл солилцож, төслийн хүрээнд хэрэгжүүлэх дижитал шийдэл, цахим платформуудын уялдаа холбоо, эрүүл мэндийн санхүүжилт дэх ЭМДЕГ-ын оролцоо болон цаашдын хамтын ажиллагааны талаар хэлэлцлээ.
Энэ үеэр ЭМДЕГ-ын дарга Ц.Батбаатар: “Бидний өнгөрсөн онд хийсэн судалгаагаар орон нутагт амьдарч буй иргэдийн 65 хувь нь шаардлагатай тусламж, үйлчилгээгээ орон нутгаасаа авч, үлдсэн хэсэг нь бусад аймаг, нийслэлийг зорьж байна. Энэхүү төсөл нь орон нутгийн эрүүл мэндийн тусламж, үйлчилгээний чадавхыг бэхжүүлж, иргэд шаардлагатай үйлчилгээгээ цаг алдалгүй, оршин суугаа газраасаа авах боломжийг нэмэгдүүлнэ гэж үзэж байна. Иймд төслийн хүрээнд хамтран ажиллахдаа таатай байна” гэсэн юм.Уулзалтад Азийн хөгжлийн банкны Эрүүл мэндийн ахлах мэргэжилтэн, ажлын хэсгийн ахлагч Динеш Арора, Нийгмийн салбарын ахлах ажилтан, ажлын хэсгийн хамтарсан ахлагч Ж.Алтантуяа болон төслийн багийн бусад төлөөлөгчид оролцов.
